ဒညင်းသီးနဲ့ ဝက်သားကြော်၊ အာလူးသီးကြော်ချက်၊ ငံပြာရည်ချက်နှင့် ပဲကြာဇံဟင်းချို

ဝက်သားကို ဆား၊ ဆနွင်းနယ်ပြီး ဆီပူထဲ ထည့်ကြော်ထားတာပါ။ ဒညင်းသီးကတော့ အခွံခွာ၊ ကျက်အောင်ပြုတ်ပြီး တစ်ချို့ကို အလုံးလိုက်ထား၊ တစ်ချို့ကို လှီးပြီး ဝက်သားကြော်ထားတဲ့အထဲ ထည့်ပြီး ဆက်ကြော်လိုက်ပါတယ်။

ဒညင်းသီးတွေက စီးနေတာပဲ။ မစီးတာ တစ်လုံးတစ်လေတောင် မပါဘူး။ အနံ့ကအတော့ ထုံးစံအတိုင်း အတော်ပြင်းတယ်။ ဒညင်းသီးစားပြီး သခွားသီးစားရင် ပါးစပ်မနံဘူးလို့ အိမ်က အစ်မက ပြောတယ်။ ဒါပေမယ့် အိမ်မှာ အသင့် မရှိလို့ မစားလိုက်ရဘူး။

အာလူးသီးကြော်ချက်
အာလူးသီး ကြော်ချက်ကတော့ သိမ်းဟင်း ချက်လိုက်တာပါ။

ထမင်း၊ ဟင်း ချက်ချင်စိတ်မရှိတဲ့အခါမျိုးမှာ စားဖို့ အိမ်မှာ တစ်ခါတစ်လေ သိမ်းဟင်း ချက်တတ်ပါတယ်။ ချက်ပြီး ရေခဲသေတ္တာထဲ ထည့်သိမ်းထားပြီးမှ စားခါနီး (ထမင်းအိုး ကျက်ခါနီး) ထမင်းအိုးထဲကို ပန်းကန်လုံးလေးနဲ့ စားမလောက် ခပ်ထည့်ပြီး နွှေးစားတာပါ။

ဂျင်း၊ ကြက်သွန်ဖြူ ထောင်းထားတာကို ဆီပူအိုးထဲ ထည့်ကြော်၊ ပြီးရင် အဲ့ဒီ့အထဲကို ပါးပါးလှီးထားတဲ့ ဝက်အသဲထည့်ကြော်၊ ခဏကြာရင် ပန်းကန်သပ်သပ်နဲ့ခပ်ပြီး ဖယ်ထားပြီး၊ အာလူး အတုံးသေးလေးတွေကို ထည့်၊ ဆား၊ အချိုမှုန့် သင့်ရုံထည့်မွှေ၊ ရေထည့်ပြီး အာလူးတွေကို ကျက်အောင် ချက်ပါတယ်။

အိုးမကပ်အောင် မကြာမကြာမွှေပေးရင်းနဲ့ အာလူးတွေ လိုချင်တဲ့အနေရပြီဆိုရင် ဝက်အသဲထည့်မွှေပြီး မီးပိတ်ထားလို့ ရပါပြီ။

ဘာမှ ထွေလီကာလီမပါဘဲ စားကောင်းတဲ့ ဟင်းရံတစ်မျိုးပါ။

ငံပြာရည်ချက်
အရင်ကတည်းက ရှိနေတဲ့ ဆီချက်တွေက နည်းနည်းကြာပြီမို့ မသုံးချင်တော့လို့ ငံပြာရည်ချက် ချက်လိုက်တာပါ။

ဆီချက်တွေကို ပြန်ကြော်ပြီး ပူလာပြီဆိုရင် ငံပြာရည်ထည့်၊ ပုစွန်ခြောက်ထည့်၊ ငရုတ်သီးမှုန့်ထည့်၊ ငရုတ်သီးစိမ်းထည့်၊ အဲ့ဒါတွေကို လုံးဖို့ ရေ အနည်းငယ်ထည့်ပြီး ရေခန်းချက်လိုက်ရင် ငံပြာရည်ချက် ရပါပြီ။

ပဲကြာဇံဟင်းချို
အရည်သောက်အတွက် ပဲကြာဇံဟင်းချိုပါ။ အရင်ကလည်း ဒီမှာ ရေးခဲ့ဖူးလို့ ထပ်မရေးတော့ပါဘူးနော်။

ခုတစ်လော စိတ်တွေ မရှည်ဖြစ်လွန်းလို့ စာတွေကို သေချာ မရေးဖြစ်တာ ဆောရီးပါ။ နောင် အာရုံစုစည်းလို့ရရင် သေချာပြန်ရေးပါ့မယ်ရှင်။ ကျေးဇူးတင်ပါတယ်။ =)