စာတွေ မရေးဖြစ်သလို ဟင်းလည်း အရင်ကလောက် မချက်ဖြစ်တာ တော်တော်ကြာသွားတယ်။ ကြာဆို ရေတွေစကြီးတော့ ရေကသာ အိမ်ဘက်ရောက်မလာတယ်.. ပထမ ၂-၃ပါတ်လောက်က အစားအသောက် ဝယ်ရတာတွေ အရမ်းကို ရှားပါးခက်ခဲသွားတာ။ ဆန်၊ ကြက်ဥ၊ ခေါက်ဆွဲနဲ့ အာလူးကြော်တွေကို ၂ပါတ်စာလောက် ဝယ်ထားပြီး အဲ့ဒါတွေက အထားခံတဲ့ အစာတွေဆိုတော့ ရေကြီးခဲ့ရင် အဲ့ဒါတွေနဲ့ အသက်ဆက်ရမယ်ဆိုပြီး ဝယ်ထားလိုက်တာ။ ဒါတောင် လွယ်လွယ်ကူကူ ပေါပေါများများ ဝယ်လို့ မရဘူး။ အိမ်နားက စူပါမားကတ်မှာ ဝယ်မရလို့ ကားစီးသွားရတဲ့ နောက်စူပါတစ်ခုကို မနက်ပိုင်း ၉-၁၀နာရီလောက် စောစောသွားဝယ်မှ ပစ္စည်းပြန်ဖြည့်ပြီးခါစမို့ ဝယ်လို့ရတာ.. ညနေဘက်များသွားလို့ကတော့ ဘာမှ သိပ်မရှိတော့ဘူး။ နောက် ရေကြီးလို့ မီးပြတ်ခဲ့ရင်စားဖို့ဆိုပြီး ဟင်းနည်းနည်းချက်ထားလိုက်ပါတယ်။ဒီလိုနဲ့ ၁ပါတ်ပြီး ၁ပါတ်သာကြာသွားတယ်.. အစာတွေလည်း ဝယ်စုထားလိုက်၊ စားလို့ကုန်သွားလိုက်၊ ပြန်ဖြည့်လိုက်သာ ဖြစ်သွားတယ်.. ရေကတော့ ခုထိ ရောက်မလာပါဘူး။
ဘန်ကောက်ပို့စ်ထဲမှာ ရေးထားတာ တစ်ချို့လူတွေက ရေကြီးတော့ ပစ္စည်းတွေတော့ ဈေးတက်တော့မှာပဲဆိုပြီး အများကြီးကို ဝယ်သိမ်းထားတာ.. သတင်းရေးသူက စူပါတစ်ခုမှာ ဈေးဝယ်သူ အမျိုးသမီးတစ်ယောက်က ဖုန်းနဲ့ သူ့မိတ်ဆွေကို ပစ္စည်းတွေ ဝယ်သိမ်းထားဖို့၊ သူဆို ကလေးနို့မှုန့်တွေကို တစ်နှစ်စာလောက် ဝယ်သိမ်းထားလိုက်ပြီဖြစ်ကြောင်း၊ ခုလည်း ရသလောက် ထပ်လာဝယ်တာဖြစ်ကြောင်း၊ နောင်ဆို ဈေးတွေတက်၊ ပစ္စည်းတွေပြတ်ဖြစ်နိုင်ကြောင်း လှမ်းပြောနေတာကို ကြုံရတယ် ပြောပါတယ်။ ကိုယ်လိုတဲ့ပစ္စည်းက သူများလည်း လိုမှာပဲ.. ဒုက္ခရောက်ချိန်မှာ မျှမျှတတ လိုသလောက်လေးပဲ ဝယ်မယ်ဆိုတဲ့ စိတ်မရှိကြတာများလို့လည်း ပစ္စည်းပြတ်တာတွေ အဲ့လောက်မြန်သွားတာဖြစ်မှာ။ ရုပ်ဝတ္တုတွေ ဘယ်လောက်ပဲ တိုးတက်တိုးတက်၊ စိတ်ဓါတ်က လိုက်ပါမလာတာ စိတ်မကောင်းစရာပါပဲ။
ရေကြီးတဲ့အထဲမှာ မပါပေမယ့် ရေဘေးဒုက္ခက ခြင်တွေ၊ ပိုးကောင်တွေအနေနဲ့ ရောက်လာပါတယ်။ တစ်ရက်၊ တစ်ရက် ညနေ ၆နာရီလောက်မှာမှ တံခါးတွေ၊ ပြတင်းပေါက်တွေကို အကုန်မပိတ်လို့ကတော့ ခြင်တွေ၊ ပိုးကောင်တွေ ဝင်လာလိုက်တာ နံရံအဖြူမှာ မည်းမည်းလှုပ်နေအောင်ကို များတာ.. ကြောက်စရာတောင် ကောင်းတယ်။ အစက သတိမထားမိခင်မှာ ခြင်တွေ အများကြီးဝင်လာတော့ စပရေးမှုတ်ပြီး အခန်းကို ပိတ်ခဲ့၊ အပြင်ခဏထွက်၊ မိနစ်၂၀-၃၀လောက်မှပြန်လာတော့ ကြမ်းပြင်ပေါ်မှာ ခြင်တွေ၊ ပိုးကောင်တွေက အတုံးအရုံးပဲ.. ဘယ်လောက်များ များသလဲ သိချင်တာနဲ့ ရေကြည့်တော့ ၂၅၀-၃၀၀လောက်ရှိတယ်။ ဒီအတိုင်းသာ ထားမိလို့ကတော့ အပ်ချုပ်စက်ထဲ ထည့်အချုပ်ခံရသလိုကို ဖြစ်မှာ။
ရေကြီးမယ်ဆိုပြီး သတင်းစကြီးတုန်းက လန့်ဖျန့်ပြီး ညနေမှာ ဈေးဝယ်ပြီး မနက်၁နာရီခွဲ၊ ၂နာရီလောက်အထိ ပြင်ဆင်ချက်ပြုတ်ခဲ့တဲ့ ရေကြီးဟင်းတွေပါ။
ကြက်ကြော် - ကြက်သားကို ဆား၊ ဆနွင်း ပါလေရုံ၊ အချိုမှုန့်၊ ငရုတ်ကောင်းမှုန့်တိုနဲ့ နယ်နှပ်ထားပြီး ကြော်ထားတာပါ။ သိပ်မာသွားမှာစိုးလို့ ကြွပ်နေအောင်မကြော်ဘဲ အသားတင်းပြီး အတွင်း၊ အပြင်ကျက်ရုံပဲ ကြော်လိုက်ပါတယ်။
အာလူးသီး၊ ကြက်သားကြော် - ကြက်သားကို ခပ်သေးသေးတုံးပြီး ဆား၊ ဆနွင်း၊ အချိုမှုန့် သင့်ရုံနဲ့ နယ်ထားပါတယ်။ အာလူးတွေကိုလည်း ကြက်သားလိုပဲ ခပ်သေးသေးတုံးပြီး ဆား၊ ဆနွင်း၊ အချိုမှုန့် သင့်ရုံနဲ့ နယ်ထားပါတယ်။ ဆီအိုးတည်ပြီး ဆီပူတော့ ကြက်သားတွေထည့်လုံး၊ အာလူးသီးထည့် မွှေ၊ ရေသင့်ရုံထည့်ပြီး ရေခန်း လုံးချက် ချက်လိုက်ပါတယ်။ ရေခန်းခါနီးမှာ မဆလာတစ်ထုပ်ထည့်၊ မွှေပြီး မီးပိတ်ထားလိုက်ပါတယ်။
အရင်က ဟင်းချက်ရင် မဆလာထည့်ချက်လေ့ သိပ်မရှိတော့ အစ်မက မဆလာမကြိုက်တာကို သတိမထားမိလိုက်ဘူး။ အဲ့လိုနဲ့ တစ်ယောက်ထဲလည်း စားမကုန်၊ နောက်ပိုင်းမှာ ပုံစံပြောင်းပြီး သီးစုံ ဘဲဥ ချဉ်ဟင်းချက်တာလည်းမကုန်နဲ၊့ ကြာသွားပြီး သွန်ပစ်လိုက်ရတဲ့စခန်းကို ရောက်သွားတဲ့ ဟင်းလေးပါ။
ကြက်ဥပြုတ်
ဒါကတော့ ရေကြီးလို့ မီးပြတ်ရင် ဒီအတိုင်း မသိုးဟင်းအဖြစ်စားဖို့ ပြုတ်ထားတဲ့ ကြက်ဥတွေထဲက တစ်ချို့ပါ။ နောက်ပိုင်းမှာ ကြက်ဥတွေက ဝယ်မရလောက်အောင် ရှားသွားပြီး၊ ဝယ်လို့ရပြန်တော့ အရမ်းကို သေးတဲ့ ကြက်ဥတွေ၊ ဘယ်လောက်တောင်သေးလဲဆိုတာ မှန်းကြည့်လို့ ရအောင် မနက်စာ ပေါင်မုန့်နဲ့စားဖို့ ကြော်ထားတဲ့ ကြက်ဥကြော်ပုံလေးပါ ထည့်လိုက်ပါတယ်။ ပုံမှန်က တစ်ယောက် တစ်လုံးကြော်ရင် မနက်စာစားလို့ရပြီ။ အခုတော့ သေးလွန်းလို့ ၂လုံးစီကြော်မှ ရတယ်။
အချိုပွဲ သလဲသီး
No comments:
Post a Comment