အိမ်မှာ အာလူးတွေ ဝယ်ထားတာ ကြာပြီ။ ဘာမှလည်း မလုပ်ဖြစ်ဘူး။ အဲ့ဒါနဲ့ ဝက်သားလုံးကြော်တဲ့အထဲ ထည့်ကြော်လိုက်မယ်လို့ စိတ်ကူးရလို့ အခုလို ကြော်ဖြစ်လိုက်ပါတယ်။
အရင်ဆုံး အာလူးကို စကာစိတ်သလို ခပ်သေးသေးလေးတွေဖြစ်အောင် လှီးထားလိုက်တယ်။
ဝက်သား ကြိတ်သားကို အကြော်မှုန့် သင့်ရုံထည့်၊ ငရုတ်ကောင်းမှုန့်ထည့်၊ အာလူးတွေထည့်၊ ဘဲဥတစ်လုံး ခေါက်ထားတာကို ထည့်ပြီး သမအောင် ရောနယ်ပါတယ်။
ဒီက မောလ်တွေမှာ ဝယ်တဲ့ ကြိတ်ပြီးသား အသားတွေက အရသာထည့်ပြီးသားမို့ ဘာမှ ထပ်ထည့်စရာ မလိုပါဘူး။ ထည့်လိုက်ရင် ငံသွားတတ်ပါတယ်။
ဆီအိုးတည်ပြီး ဆီပူလာရင် ဇွန်းလေးနဲ့ ခပ်ခပ်ထည့်ပြီး အိုးထဲဆီရှိသလောက်ထဲမှာ ပြည့်အောင် စီထည့်လိုက်ပါ။ အိုးကို လှုပ်ကြည့်လို့ အသားတုံးလေးတွေ ရွေ့လိုက်လာရင် ဟိုဘက်၊ ဒီဘက်လှန်ပေးပါ။
နှစ်ဘက်လုံး ညိုဝါရောင်သန်းလာပြီဆိုရင် ဆယ်ယူပြီး ဆီစစ်ဇကာထဲထည့် ဆီစစ်ထားပါ။ ဇကာမသုံးတဲ့သူများ တစ်သျှူးအမာစားခံထားတဲ့ ပန်းကန်ထဲထည့်ပြီး ဆီစစ်လည်း ရပါတယ်။ ဆီများရင် စားမကောင်းမှာ စိုးလို့ပါ။
အားလုံးပြီးရင်တော့ ဆီ၊ ဆားနယ်ထားတဲ့ ထမင်းပူပူလေးနဲ့ တွဲဖက်သုံးဆောင်နိုင်ပါပြီ။ အချဉ်ကြိုက်တတ်ရင် ပုလင်း ငရုတ်ဆီလေးနဲ့ စားလို့ ရပါတယ်။
No comments:
Post a Comment