ဝက်ခေါက်သုပ်

တစ်နေ့ တစ်နေ့ ဒါတွေပဲစားနေရတယ် ထင်လို့ အပြောင်းအလဲဖြစ်အောင် တစ်ခါမှလုပ်မစားဖူးတာ စားကြည့်မယ်ဆိုပြီး ဈေးကနေ ဝက်အခေါက် (ဆေးပြီး အမျှင်လေးတွေဖြတ်ပြီးသား) တစ်ကဒ်ဝယ်လာခဲ့တယ်။ ဘယ်လို သုပ်စားရင် ကောင်းမလဲ စဉ်းစားရင်းနဲ့ နောက်ဆုံးတော့ ထုံးစံအတိုင်း မြန်မာ့နည်း မြန်မာ့ဟန်လေးပဲ သုပ်လိုက်ပါတယ်။

၁။ လှီးထားပြီးသား ဝက်ခေါက်တွေကို ရေနွေးဖျောပြီး ညှပ်ထားပါတယ်။ မညှပ်ရင် အမျှင်တွေက သိပ်ရှည်နေတော့ သုပ်ရတာ အရသာ မနှံ့မှာစိုးလို့။

၂။ မုန်ညှင်းဖြူထုပ်ကို အရွက်တွေပဲယူပြီး အနေတော် ဖြတ်ထားပါတယ်။ (မုန်ညှင်းဖြူက ဂေါ်ဖီထက် စားရတာ ပိုနူးညံ့ပြီး အနံ့လည်း မနံဘူးဆိုတော့ ပိုစားကောင်းတယ်ထင်လို့ မုန်ညှင်းဖြူကိုပဲ သုံးလိုက်တာ။)

၃။ ခရမ်းချဉ်သီး တစ်လုံး၊ ငရုတ်သီးစိမ်း ၃တောင့်လောက်ကို ပါးပါးလှီးထားပါတယ်။

၎။ သံပုရာသီးတစ်လုံးကို လေးပုံ၊ သုံးပုံလောက် အရည်ညှစ်ထည့်ဖို့ အဆင်သင့် လှီးထားပါတယ်။

၅။ ပဲမှုန့်ထည့် မသုတ်ချင်လို့ လက်ဖက်နဲ့စားတဲ့ နှစ်ပြန်ကြော်ကို ညက်အောင်ထောင်းထားပါတယ်။

၆။ ထည့်မယ့် အစာပလာတွေ စုံပြီဆိုတော့ အားလုံးကို သုတ်မယ့်ဇလုံထဲထည့်၊ ဆီ၊ ဆား၊ အချိုမှုန့်၊ ငံပြာရည် သင့်ရုံထည့်ပြီး သမအောင်နယ်ပါတယ်။ ပြီးရင်တော့ ဟင်းပန်းကန်ထဲထည့်၊ ကြက်သွန်ဖြူကြော်ဖြူးပြီး သုံးဆောင်နိုင်ပါပြီ။

ကြက်သား ခေါက်ဆွဲပြုတ်

ပြီးခဲ့တဲ့ အပါတ်က ရန်ကုန်က ရွှေညောင်ပင် ကြက်သားသုပ်မျိုး စားချင်စိတ်ပေါက်နေလို့ အိမ်က အစ်မကို ကာဘိုင်ဆင် ကြက်သားသုပ်လုပ်ကျွေးမယ်ဆိုပြီး (တကယ်တော့ ကာဘိုင်ဆင်ဆိုတာ ဘာမှန်းမသိပါဘူး။ ကြားဖူးနားဝနဲ့ လျှောက်ပြောတာ။) ကြက်အရိုး၊ အသားတွဲလျှက်တွေ ဝယ်လာခဲ့တယ်။ ထင်ရာမြင်ရာတွေ လျှောက်လုပ်မယ်ပေါ့ဆိုပြီး...

၁။ အရင်ဆုံး ကြက်အရိုး၊ အသားတွေကို ကြက်သွန်ဖြူ ဒါးပြားရိုက်၊ ဂျင်းအပြားလိုက်လှီးထည့်ပြီး ဆား၊ အချိုမှုန့်၊ ခနော အချိုခဲထည့်ပြီး ပြုတ်လိုက်တယ်။

၂။ ကြက်ဥလည်း ရေစင်အောင်ဆေးပြီး ထည့်ပြုတ်လိုက်တယ်။

၃။ ဘဲသွေးလည်းတွေ့လို့ ဒီမှာတစ်ခါမှ စမ်းမချက်စားဖူးတာကြောင့် ဘဲသွေးလေးတွေ ရေဆေးပြီး လိုချင်သလောက်အရွယ် တုံးထားလိုက်တယ်။

၎။ ကြက်သားတွေ ကျက်လောက်ပြီဆိုတော့ ဆယ်ပြီး အသားနွှင်၊ အရိုးကို ခဏ ပြန်ထည့်ပြုတ်ထားလိုက်တယ်။

၅။ ကြက်ဥကိုလည်း အခွံနွှာပြီး ပြန်ထည့်ပြုတ်ထားတယ်။ အရသာများ ဝင်မလားလို့။ ဝက်သား ဒုတ်ထိုးအိုးထဲက ဘဲဥလိုမျိုးလေ။

စိတ်ကူးတာကတော့ နောက်နေ့မှ ကုလားစာကြိုက်တတ်တဲ့သူတွေကို ဘယ်လိုလုပ်ရလဲ ဘာညာမေး၊ သူများ ဘလော့ဂ်တွေမှာ လျှောက်ရှာပြီး လုပ်မယ်။ ကြက်ပြုတ်ရည်ထဲကို ကုလားပဲမှုန့် နည်းနည်းထည့်ကျိုလိုက်ရင် ပဲရည်ကျဲကျဲရမယ်.. ကြက်သားကို ဂေါ်ဖီတို့ ဘာတို့နဲ့ တူအောင် လျှောက်လုပ်မယ်လို့ စဉ်းစားထားခဲ့တာ..။ ကြက်ပြုတ်ရည်က သိပ်မွှေးနေတော့ အစ်မကလည်း မြည်းချင်.. ကိုယ်ကလည်း မြည်းချင်တာနဲ့..။

၆။ ကြက်ရိုးတွေကို ဖယ်ပစ်လိုက်ပြီး ကြက်သား ဟင်းချက်ဇွန်းနဲ့ တစ်ဇွန်းထည့်၊ ဘဲသွေးတုံးတွေထည့်ပြီး ကြက်ပြုတ်ရည်အဖြစ် သောက်ကြည့်တော့ တော်တော်သောက်ကောင်းတယ်။ (အိမ်မှာက မြည်းရင် ဟင်းရည်သောက်ပန်းကန်လုံးလေးနဲ့ နှစ်လုံးလောက် သောက်တာကို ပြောတာ။ :D)

ဒီလိုနဲ့ပဲ စားကောင်းမကောင်း မသေချာ မရေရာတဲ့ ကာဘိုင်ဆင်ကြက်သားသုပ် လုပ်မယ့်အစား စားကောင်းမှာ သေချာတဲ့ ကြက်သား ခေါက်ဆွဲပြုတ်ပဲ လုပ်စားလိုက်တော့မယ်ဆိုပြီး..

၇။ ကြက်သားပြုတ်ရည်ကို ရေနည်းနည်းထပ်ထည့် (ညက မြည်းတာ များသွားလို့)၊ ပွက်ရင် ခေါက်ဆွဲထည့်ပြုတ်၊ ခေါက်ဆွဲကျက်တော့ ညကနွှင်ထားတဲ့ ကြက်သား စားချင်သလောက်ထည့်၊ ဘဲသွေးလေးတွေထည့်၊ ကြက်ဥပြုတ်ကို လေးစိတ်စိတ်ပြီးထည့်၊ တစ်ခါဆူအောင် ထားလိုက်ပါတယ်။

ပြီးရင်တော့ ပန်းကန်ထဲကို စားချင်သလောက်ထည့်ပြီး အားရပါးရ သုံးဆောင်လို့ရပါပြီ။

(ကြက်သား ခေါက်ဆွဲပြုတ်က အီလို့ နည်းနည်းချင်း ထည့်စားတာ ပိုအဆင်ပြေပါလိမ့်မယ်။ ကျမတို့ကတော့ စားလို့ ကုန်မယ်ထင်ပြီး ထည့်လိုက်တာ တစ်ဝက်တောင် အနိုင်နိုင် ကုန်အောင် စားရတယ်။)

တို့ဟူးသုပ်

ပြီးခဲ့တဲ့အပါတ်က အိမ်မှာ ရန်ကုန်က စိန်ဖြိုးတံဆိပ် တိုဟူးမှုန့်ကို ကျိုပြီး သုပ်စားဖြစ်ခဲ့ပါတယ်။ သူများတွေက စိန်ဖြိုးတံဆိပ် တိုဟူးမှုန့်က ကောင်းတယ် ပြောကြလို့ ဝယ်ပြီး ကျိုကြည့်တာ တော်တော်လေး အဆင်ပြေပါတယ်။ မွှေးထက် ပိုကောင်းတယ်လို့တောင် ထင်မိတယ်။ တို့ဟူးကို အညွှန်းအတိုင်း ကျို၊ ခဲ ထားပြီး သုပ်စား၊ ကြော်စားနိုင်ပါတယ်။

ဒီရက်ပိုင်း အလုပ်တွေရှုပ်နေတာနဲ့ ပို့စ်အသစ်တွေ မရေးဖြစ်တာတောင် တော်တော်ကြာပြီ။ ဒါပေမယ့် လုပ်စားဖြစ်သမျှကိုတော့ အကုန်နီးပါး ဓါတ်ပုံရိုက်ထားပြီး ဖြည်းဖြည်းချင်း ပို့စ်တင်မယ်လို့ ရည်ရွယ်ထားပါတယ်။

တိုဟူးသုပ်လုပ်တာက အရမ်းလွယ်ပါတယ်။

၁။ ကျိုထားတဲ့ တိုဟူး၊ ဂေါ်ဖီ၊ နံနံပင်၊ ငရုတ်သီးစိမ်းတို့ကို ပါးပါးလှီး ထားပါ။

၂။ ပါးပါးလှီးထားတဲ့ အဆာပလာတွေကို နယ်မယ့်ဇလုံထဲထည့်ပြီး ဆီ၊ ဆား၊ အချိုမှုန့်၊ ငရုတ်သီးမှုန့်၊ ကြက်သွန်ဖြူကြော် သင့်ရုံထည့်၊ သံပုရာရည် သင့်ရုံညှစ်ပြီး သမအောင်နယ်ပြီးရင် ခံတွင်းမြိန်မယ့် ဟင်းတစ်ခွက်ရပါပြီ။

ဝက်အူချောင်းကြော်သုပ်

ရန်ကုန်က ရောက်လာတဲ့ ကြော်ပြီးသား ဝက်အူချောင်းတွေကို ဒီအတိုင်း စားရတာ ရိုးလာလို့ အပြောင်းအလဲဖြစ်အောင် သုပ်စားလိုက်ပါတယ်။

၁။ ကြက်သွန်နီ ၁ဥကို ပါးပါးလှီးပြီး ရေစိမ်ထားပါတယ်။

၂။ နံနံပင် ၂ ပင်၊ ငရုတ်သီးစိမ်း ၂ တောင့်ကို ရေဆေးပြီး ပါးပါးလှီးထားပါတယ်။

၃။ စားလိုသလောက် ဝက်အူချောင်းကြော်ကို ခပ်ပါးပါး အစောင်းလိုက် လှီးထားပါတယ်။

၎။ ပါးပါးလှီးထားတဲ့ ကြက်သွန်နီ၊ နံနံပင်၊ ငရုတ်သီးစိမ်း နဲ့ ဝက်အူချောင်းကြော်တွေကို နယ်မယ့် ပန်းကန်ထဲထည့်၊ ကြက်သွန်ဖြူကြော် သင့်ရုံထည့်၊ သံပုရာသီး ၁ခြမ်း အရည်ညှစ်ထည့်၊ ဆီ၊ ဆား၊ အချိုမှုန့်၊ ငံပြာရည် သင့်ရုံထည့်ပြီး သမအောင် နယ်ပြီးရင် ခံတွင်းမြန်စေမယ့် ချဉ်၊ ငံ၊ စပ် ဝက်အူချောင်းကြော်သုပ် တစ်ပွဲ ရပါပြီ။

မှိုထောင်း

မှိုထောင်းက ကျမ အနှစ်သက်ဆုံး အစားအစာတွေထဲက တစ်ခုပါ။ အခုတွေး အခုစားချင်တဲ့ အစာမျိုး။ နောင်ခိုင်မြို့ကို ရောက်တုန်းက စစားဖူးခဲ့တာ။ သူတို့ ရောင်းတာက ကျမလုပ်တာထက် အများကြီး ပိုကောင်းပါတယ်။ ကျမကတော့ စားခဲ့ရတဲ့ အရသာအတိုင်း မှန်းဆပြီးလုပ်ထားတာမို့ ပါဝင်ပစ္စည်းနဲ့ လက်ဆတွေ ကွာပါလိမ့်မယ်။

၁။ ကြက်သွန်ဖြူ၊ ကြက်သွန်နီ (ဥအသေး)နဲ့ ငရုတ်သီး အစိမ်းတောင့်တွေကို ကျက်သွားအောင် လှော်ပါတယ်။ ပြုတ်ပြီး၊ ရေစစ်ပြီး ခြောက်အောင် လှော်ရင်လည်း အဆင်ပြေမယ် ထင်ပါတယ်။

၂။ ငါးသေတ္တာဗူးထဲက ငါးကို ရေဆေး၊ အရိုးဖယ်၊ ချေပြီး ခြောက်အောင် လှော်ထားပါတယ်။ ကိုယ်နှစ်သက်ရာငါးကို ဆား၊ အချိုမှုန့်သင့်ရုံ၊ ကြက်သွန်ဖြူနဲ့ ဂျင်းအနည်းငယ် ပါးပါးလှီးထည့်၊ ဆနွင်းပါလေကာလေးထည့်ပြီး ရေခန်းပြုတ်၊ အသားနွှင်ထားတာ ထည့်ရင်လည်း ရပါတယ်။

၃။ မှိုကို (စားချင်တဲ့မှိုအမျိုးအစား၊ ကောက်ရိုးမှိုတို့.. ငွေနှင်းမှိုတို့ကတော့ သိပ်နုတော့ အဆင်ပြေပါမလား မသိ။)ခပ်သေးသေးတုံး၊ ဆီပါလေကာ၊ ဆား၊ အချိုမှုန့် သင့်ရုံထည့်ပြီး ရေစပ်စပ်လေးနဲ့ ဆီကျန်၊ ရေကျန်လေး ကျက်ရုံ ချက်ထားပါတယ်။

၎။ လှော်ထားတဲ့ ကြက်သွန်ဖြူ၊ နီ၊ ငရုတ်သီးတွေကို အတတ်နိုင်ဆုံး ညက်အောင် ထောင်းရပါတယ်။ ကျမထောင်းတာတော့ သိပ်မညက်ပါဘူး။

၅။ ပြီးရင် ငါးထည့်ပြီး ဆက်ထောင်း၊ ငံပြာရည်သင့်ရုံထည့်၊ သံပုရာသီး တစ်လုံး အရည်ညှစ်ထည့်၊ ဆား၊ အချိုမှုန့် အနည်းငယ်ထည့်၊ ချက်ထားတဲ့ မှိုထည့်ပြီး နဲနဲထောင်း၊ သမအောင်မွှေပြီးရင် အရမ်းကို စားကောင်းတဲ့ မှိုထောင်းကို ရပါပြီ။

အီတလီခေါက်ဆွဲ (သို့) Spaghetti

ရန်ကုန်က စားစရာတွေ အများကြီး ရောက်နေတာရယ်၊ ညီမတစ်ယောက် ရောက်နေလို့ အပြင်ထွက်တာများပြီး အပြင်မှာ အစားများနေတာရယ်ကြောင့် အိမ်မှာ ဟင်းသိပ်မချက်ဖြစ်တာတောင် ကြာပြီ။ ချက်စားဖြစ်ရင်လည်း ကိုယ်တိုင်ချက်တာမဟုတ်ဘဲ ညီမကပဲ ချက်နေတာမို့ သူ့ချက်နည်းက အဆန်းဖြစ်နေတာကြောင့် ပို့စ်မတင်ဖြစ်တော့ဘူး။

ဒီနေ့တော့ အိမ်မှာ ညီမက ချက်ပေးလို့ Spaghetti စားဖြစ်ကြပါတယ်။ ဒီတစ်ခါတော့ သူ့ကို ချက်နည်းမေးပြီး ပုံလေးနဲ့တွဲပြီး တင်လိုက်ပါတယ်။

၁။ ကြက်သားကို တောက်တောက်စင်း၊ မှိုကို သေးသေးလေးတွေ လှီး၊ ကြက်သွန်ဖြူကို ပါးပါးလှီးထားပါတယ်။

၂။ ဟင်းအိုးထဲကို ဆီနည်းနည်းထည့်ပြီး ကြက်သွန်ဖြူဆီသတ်ပါတယ်။ (သူများတွေက သံလွင်ဆီထည့်ကြပါတယ်။ အိမ်မှာတော့ ဆန်ဆီပဲ ရှိလို့ ရှိတာလေးပဲ ထည့်လိုက်ပါတယ်။) ကြက်သွန်ဖြူလေးတွေ နည်းနည်းညိုလာရင် ကြက်သားနဲ့ မှိုထည့်၊ ငရုတ်ကောင်း၊ ဆား၊ အချိုမှုန့် သင့်ရုံထည့်ပြီး ကျက်အောင် ဆီသတ်ပါ။

၃။ အသားတွေ၊ မှိုတွေကျက်ပြီဆိုရင် သံဗူးခရမ်းချဉ်သီးဆော့စ်ထည့်ပြီး နည်းနည်းခြောက်အောင် မွှေပါတယ်။ ကိုယ့်ဘာသာကိုယ် ချက်တဲ့ ခရမ်းချဉ်သီး အနှစ်ထည့်လည်း ရပါတယ်။ ကျမကတော့ မလုပ်ဖူးပါ။ လုပ်လည်း မလုပ်တတ်သေးပါဘူး။

၎။ ပြီးရင် Spaghetti ဆော့စ် တစ်ပုလင်းလုံးထည့်ပြီး ဆက်မွှေပါ။ လိုချင်တဲ့ အပျစ်အကျဲအလိုက် ဆော့စ်ကို ပြုပြင်ပါတယ်။ ဆော့စ်ရပြီဆိုရင် ငရုတ်သီးစိမ်းလေး သင့်ရုံကို ဗိုက်ဖောက်ထည့်ပြီး ပူစီနံကြိုက်တတ်ရင် နောက်ဆုံးမှာ ပူစီနံရွက်လေးတွေ အုပ်ပြီး မီးပိတ်လို့ ရပါပြီ။ အေးပြီဆိုရင် ပိုနေတဲ့ အနှစ်တွေကို ဗူးလေးနဲ့ ခပ်ပြီး နောင်စားချင်ရင် နွှေးစားဖို့ သိမ်းထားလို့ရပါတယ်။

၅။ Spaghetti ခေါက်ဆွဲကိုတော့ အသေးဆုံးလေးတွေပဲ သုံးပါတယ်။ အဲဒါလေးတွေနဲ့ စားရတာ ပိုအရသာရှိတယ် ထင်လို့။

၆။ စားချင်သလောက် ခေါက်ဆွဲထဲကို ဆော့စ်သင့်ရုံထည့်ပြီး သမအောင်နယ်ပြီးတဲ့အခါ အင်မတန်စားကောင်းတဲ့ Spaghetti ကို စိတ်ကြိုက်သုံးဆောင်နိုင်ပါပြီရှင်။

ပုစွန်ကြော်ချက်

ဟိုတစ်နေ့က ချက်တဲ့ ကြက်ဥတို့ဟူး၊ ပုဇွန်ဟင်းထဲက ပုဇွန်တွေကို အိမ်က သခင်မလေးက ညှီလို့ဆိုပြီး မစားပါဘူး။ ဒါပေမယ့် ပုဇွန်အစိမ်းတွေကလည်း ကျန်နေသေးတော့ မညှီအောင် ကြက်သွန်ဖြူနိုင်ချင်းနဲ့ အနံပျောက် အခြောက်ချက်လိုက်ပါတယ်။ ကြက်သွန်ဖြူ တူးမှာစိုးလို့ ဆီပိုထည့်လိုက်တာ ဆီတော့ နည်းနည်းများသွားတယ်။

၁။ ကြက်သွန်ဖြူ ၈မြှောင့်ကို ထောင်းထားပါတယ်။

၂။ ပုဇွန်တွေကို အခွံခွာထားပါတယ်။

၃။ ဆီအိုးတည်ပြီး ကြက်သွန်ဖြူတွေကို ရွှေဝါရောင်ဖြစ်အောင် ကြော်ပါတယ်။

၎။ ကြက်သွန်ဖြူရရင် ငရုတ်သီး အရောင်တင်မှုန့် လက်ဖက်ရည်ဇွန်းနဲ့ ၁ဇွန်းလောက်ထည့်၊ ငံပြာရည် ဟင်းချက်ဇွန်းနဲ့ ၁ဇွန်းထည့်ပြီး တစ်ချက်မွှေ၊ ပြီးရင် ပုဇွန်ထည့်ပြီး ခြောက်သွားတဲ့အထိ ကြော်ပါတယ်။ ပုဇွန်လေး တင်းတင်းရင်းရင်း ဖြစ်သွားပြီဆိုရင် ဟင်းကျက်ပါပြီ။

ထမင်းပူပူလေးနဲ့ နယ်ပြီးစားရင် အရမ်းကို စားကောင်းပါတယ်။

ကြက်ဥတို့ဟူး၊ ပုဇွန်ဟင်း

ဒီဟင်းကို လွန်ခဲ့တဲ့ ၅-၆နှစ်လောက်က ရန်ကုန်မှာရှိတဲ့ ထိုင်းဆိုင် တစ်ဆိုင်မှာ စားဖူးခဲ့တာ။ ဘယ်လိုအရသာမျိုးလဲဆိုတာ သေချာ မမှတ်မိတော့လို့ မှန်းပြီး ချက်လိုက်ပါတယ်။

၁။ ကြက်သွန်ဖြူ ၂မြှောင့်ကို ဇကာစိတ်စိပ်ထား၊ ကြက်သွန်နီ ၁ဥကို ၈စိတ်စိပ်၊ ကြက်သွန်မြိတ် ၂ပင်ကို ၂လက်မအရှည်လောက် ဖြတ်ထားပါတယ်။

၂။ ကြက်ဥ ၁လုံးကို ခေါက်ထားပါတယ်။

၃။ ပုဇွန်ကို ၁၅ကောင်ကို အခွံခွာထားပါတယ်။

၎။ ကြက်ဥတို့ဟူးနှစ်တောင့်ကို ဖောက်ပြီး ၁လက်မ အထူလောက် အပိုင်းလေးတွေဖြတ်ပြီး၊ ဆီအိုးထဲ ဆီခပ်များများထည့်ပြီး အပေါ်ယံလေးတွေ ညိုရောင်သန်းအောင် ကြော်ပါတယ်။ ကြော်တဲ့အခါမှာ အကျက်ညီအောင် ဟိုဘက်ဒီဘက်လှန်ပေးပါ။ ပြီးရင် ဆီစစ်ပြီး ပန်းကန်နဲ့ သတ်သတ်ဖယ်ထားပါ။ ဟင်းချက်ဖို့ ဆီတွေက များနေမှာမို့ လိုသလောက်ပဲချန်ထားပြီး ကျန်ဆီတွေကို ပန်းကန်တစ်လုံးနဲ့ သတ်သတ်ဖယ်ထားပါ။

၅။ ကြက်သွန်ဖြူကို အရင်ဆီသတ်၊ ကျက်ရင် ကြက်သွန်နီထည့်ကြော်၊ ညိုရောင်သန်းလာရင် ပုဇွန်ထည့်ကြော်ပါတယ်။

၆။ ပုဇွန်ကျက်ပြီဆိုရင် ရေနည်းနည်းထည့်၊ ပဲငံပြာရည်နဲ့ ဆားသင့်ရုံထည့်ပြီး ကြက်ဥကို ဖြည်းဖြည်းချင်း အမျှင်လေးတွေဖြစ်အောင်လောင်းထည့်ပြီး မွှေပါတယ်။

၆။ ပြီးရင် ကြော်ထားတဲ့ ကြက်ဥတိုဟူးထည့်၊ ရောမွှေ၊ ကြက်သွန်မြိတ်နဲ့ငရုတ်ကောင်းအုပ်ပြီး အဖုံးခဏပိတ်ထားပါ။ ခဏကြာရင် အနံ့၊ အရသာနဲ့ပြည့်စုံတဲ့ ကြက်ဥတို့ဟူး၊ ပုဇွန်ဟင်းတစ်ခွက်ကို သုံးဆောင်နိုင်ပါပြီ။

အိမ်မှာ ဘာဟင်းချက်ချက် ဆီနည်းနည်းပဲသုံးတော့ ဟင်းတွေက သိပ်မလှဘူး ဖြစ်နေတယ်။ ဒီဟင်းက ဆီနဲနဲပိုများရင် ပိုကောင်းမယ်ထင်ပါတယ်။ နောက်ပြီး ကြက်ဥထည့်ပုံက ဆိုင်တွေမှာလို အမျှင်လေးတွေဖြစ်မနေဘူး။ ဘာလို့လည်းဆိုတာလည်း မသိဘူး။ သိရင် ပြောပြပေးသွားကြပါရှင်။ ကျေးဇူးတင်ပါတယ်။

ကြက်ကင်သုပ်

ဒီနေ့ညနေ အိမ်နားမှာ ကြက်သားကင်ဆိုင်တွေ့တာနဲ့ ကြက်ကင်သုပ်စားဖြစ်ပါတယ်။ ကြက်ကင်သုပ်က ကြက်ကင်ကို ဝယ်ပြီး သူ့မှာပါတဲ့ အချဉ်ရည်နဲ့သုပ်တာမို့ ကိုယ်တိုင်ဘာမှ လုပ်ဖို့မလိုသလောက်ပါပဲ။ ကိုယ့်ဘာသာလုပ်စားမယ်ဆိုရင် လုပ်စားလို့ရအောင် ကြက်ကင်နည်းနဲ့ အချဉ်လုပ်နည်းကို အောက်မှာ ရေးထားပါတယ်။

၁။ အရင်ဆုံး ဂေါ်ဖီနဲ့ ခရမ်းချဉ်သီးကို ပါးပါးလှီးပါတယ်။

၂။ ကြက်သားကင်ကို အရိုးဖယ်ပြီး အသားတွေကို မျှင်ထားပါတယ်။

၃။ ဂေါ်ဖီ၊ ခရမ်းချဉ်သီး၊ ကြက်သားကင်တို့ကို နယ်မယ့် ဇလုံထဲထည့်ပြီး အချဉ်ရည်၊ ဆီအနည်းငယ်၊ ငံပြာရည်သင့်ရုံ၊ ဆားသင့်ရုံထည့်ပြီး သမအောင် နယ်ပါ။ လွယ်လွယ်ကူကူနဲ့ အရသာရှိတဲ့ ကြက်ကင်သုပ်တစ်ပွဲကို သုံးဆောင်နိုင်ပါပြီ။

ကြက်ကင်လုပ်နည်း

ခရုဆီအနည်းငယ်၊ ဆား၊ ငရုတ်ကောင်းသင့်ရုံနဲ့ ကြက်သားကို နှံ့အောင် နယ်ပြီး ခဏနှပ်ထားပြီး ovenထဲထည့်၊ ၅မိနစ်ကင်၊ ပြီးရင် ဟိုဘက်ဒီဘက်လှန်ပြီး ၅မိနစ်ထပ်ကင်ပေးပါ။ အနံ့မွှေးလာပြီး ညိုရောင်သန်းလာရင် ရပါပြီ။

အချဉ်လုပ်နည်း

မန်ကျည်းမှည့်ရည်ခပ်ကျဲကျဲလေးထဲကို ငရုတ်သီး အကျက်မှုန့်၊ ဆားအနည်းငယ်၊ အချိုမှုန့်အနည်းငယ်ထည့်ပြီး ဖျော်လိုက်ရင် ကြက်ကင် (သို့) ကြက်ကင်သုပ်နဲ့ စားဖို့ အချဉ်ရည် ရပါပြီ။

ပဲပြားဟင်း

မနေ့က နွေးနေခြည်ရဲ့ ဖေ့စ်ဘွတ်ခ်က ပုံတွေထဲက ပဲပြားဟင်းပုံကို တွေ့တာနဲ့ ပဲပြားဟင်းစားချင်စိတ်ပေါက်လာလို့ အိမ်မှာလည်း ခရမ်းချဉ်သီးနဲ့ ပဲပြား အဆင်သင့်ရှိတာနဲ့ ချက်လိုက်ပါတယ်။

၁။ ပဲပြားကို ခပ်ပါးပါးတုံးပြီး ဆား၊ အချိုမှုန့်နယ်ထားပါတယ်။

၂။ ကြက်သွန်နီ ၁ဥ၊ ခရမ်းချဉ်သီး ၃လုံးကို ပါးပါးလှီးထားပါတယ်။

၃။ အိုးထဲကို ပဲပြားကြော်ဖို့ ဆီသင့်ရုံထည့်၊ ဆီကျက်ရင် ဆနွင်းမှုန့်ထည့်၊ ပဲပြားထည့်ပြီး အပေါ်ယံတင်းအောင် ကြော်ပါတယ်။ ရပြီဆိုရင် ပဲပြားကြော်ကို ဆယ်ပြီး ပန်းကန်တစ်လုံးထဲမှာ သတ်သတ်ဖယ်ထားပါတယ်။

၎။ ကျန်နေတဲ့ဆီတွေ သိပ်မများဘူးဆိုရင် ကြက်သွန်နီကို ဆီအရင်သတ်ပြီး ခရမ်းချဉ်သီးကို လိတ်နေအောင် ဆီသတ်ပါတယ်။ (ဆီများရင်တော့ ခပ်ပြီး ဖယ်ထားပါ။ နောက်တစ်ခါ ဟင်းချက်လို့ ထည့်သုံးချင်ရင် သုံးလို့ ရအောင်လို့ပါ။)

၅။ ခရမ်းချဉ်သီး လိတ်ပြီဆိုရင် ပဲငံပြာရည် သင့်ရုံထည့်၊ ဆားနည်းနည်းထည့်ပြီး ငရုတ်သီးစိမ်း ၅တောင့်လောက်ထည့် မွှေပါတယ်။

၆။ ခဏနေရင် ပဲပြားကြော်တွေထည့်၊ ရေနည်းနည်းထည့်ပြီး ရေခန်းအောင် ချက်ပါတယ်။ ရေခန်းလို့ ဆီပြန်ပြီဆိုရင် ပဲပြားဟင်း ရပါပြီ။